Bakıda "Davamlı inkişaf üçün fotosintez tədqiqatları" mövzusunda beynəlxalq elmi konfrans iyulun 29-da davam etmişdir. 
Tədbirin ölkəmizdə keçirilməsi akademik Cəlal Əliyevin fotosintezin tədqiqi üzrə əldə etdiyi böyük uğurlar, fotosintezin kompleks şəkildə araşdırılması və öyrənilməsi sahəsində dünya elminə verdiyi töhfələrlə bağlıdır.
Konfransda Barry Bruce (ABŞ) "Fotoelektrik yuvacıqlarında fotosintetik komplekslərin inteqrasiya strategiyaları", Olaf Kruse (Almaniya) "İşığın biokütləyə çevrilməsinin molekulyar aspektləri", Anatoliy Tsygankov (Rusiya) "Purpur bakteriyaları hidrogen istehsalçıları kimi", Joanna Grzyb (Polşa) "Zülalların De novo dizayn- fotosintetik sistemlər üçün modullar" mövzularında məruzələr etmişlər.
Digər alimlərin çıxışları da dinlənilmiş, fotosintez prosesinin mühüm istiqamətləri üzrə müzakirələr olmuşdur.
Beynəlxalq konfransda Azərbaycan, Böyük Britaniya, Hindistan, ABŞ, Fransa, Yaponiya, Almaniya, Rusiya, Finlandiya və digər ölkələrdən olan alim və mütəxəssislər iştirak edirlər.

AzərTAc