Heydər Əliyev Fondunun təşkil etdiyi Qəbələ III Beynəlxalq Musiqi Festivalı çərçivəsində kamera musiqisi və "Viva opera" konserti olmuşdur. 
İyulun 25-də "Qafqaz Resorte" otelində keçirilən kamera musiqisi konsertində görkəmli Avropa və Azərbaycan bəstəkarlarının əsərlərindən parçalar səsləndirilmişdir.
İkinci hissədə Üzeyir Hacıbəyli adına Azərbaycan Dövlət Simfonik Orkestrinin "Viva opera" konserti olmuşdur. Konsertdə dünya şöhrətli bəstəkarlardan C.Verdinin, J.Bizenin, V.Bellinin, L.Delibin, N.Rimski-Korsakovun, F.Əmirovun, F.Çileanın, C.Puccininin və P.Leonkavallonun operalarından ariyalar və duetlər ifa olunmuşdur.
Konsertlərdə pianoçular - Ü.Hacıbəyli adına Bakı Musiqi Akademiyasının dosenti, əməkdar artist Kəmalə Neymanova, əməkdar artist Nərgiz Əliyarova, əməkdar artist, Prezident təqaüdçüsü Gülnaz İsmayılova, Azərbaycan Dövlət Akademik Opera və Balet Teatrının solistləri Fəridə Məmmədova və Səbinə Əsədova, Azərbaycan Dövlət Musiqili Komediya Teatrının solisti Ülviyyə Novruzova, əməkdar artist, Prezident təqaüdçüsü Əvəz Abdullayev, Azərbaycan Dövlət Simfonik Orkestrinin dirijoru, xalq artisti Azad Əliyev, beynəlxalq mükafatlar laureatı Yusif Eyvazov çıxış etmişlər.