Rusiya Gənclərinin İctimai Palatasının nümayəndələri Rusiyanın Azərbaycanlı Gənclər Təşkilatının sədri, Heydər Əliyev Fondunun vitse-prezidenti Leyla Əliyevanın dəvəti ilə Azərbaycanda səfərdədirlər.
İyulun 20-də qonaqlar Gənclər və İdman Nazirliyində olmuşlar. Görüşdə gənclər və idman nazirinin müavini İntiqam Babayev qurumun fəaliyyəti haqqında qonaqlara məlumat verərək bildirmişdir ki, ölkəmizdə həm gənclər, həm də idman sahəsində mühüm islahatlar aparılır.
Nazir müavini Azərbaycanda uğurla həyata keçirilən gənclər siyasəti, müxtəlif layihələr, əldə edilmiş uğurlar və beynəlxalq əlaqələrdən danışmışdır. Qonaqlara inşa ediləcək Gənclər Mərkəzi və yaradılacaq Gənclər Fondu, hər il xaricdə təhsil alan azərbaycanlı tələbələrin forumunun yüksək səviyyədə təşkil olunması və xarici ölkələrdə "Mən Azərbaycan haqqında nə bilirəm?!" inşa müsabiqəsinin keçirildiyi barədə məlumat verilmişdir. İ.Babayev rusiyalı gənclərlə sıx əməkdaşlığı razılıqla vurğulamışdır.
Qonaqlar görüşə görə minnətdarlıq etmiş, belə səfərlərin gələcəkdə iki ölkə arasında gənclər və idman sahəsində əməkdaşlığın daha da möhkəmləndirilməsinə töhfə verəcəyini bildirmişlər.
Artıq beşinci ildir ki, Rusiyanın Azərbaycanlı Gənclər Təşkilatının sədri, Heydər Əliyev Fondunun vitse-prezidenti Leyla Əliyevanın təşəbbüsü ilə Rusiya gənclərinin ölkəmizə səfəri təşkil olunur. Səfərin məqsədi gənclərin Azərbaycan haqqında məlumatlarının artırılması, birgə əməkdaşlığın daha da möhkəmləndirilməsidir.{nl}