Əfqanıstanda qəzaya uğrayan Azərbaycan təyyarəsinin "qara qutusu" amerikalı hərbçilər tərəfindən tapılıb və şifrini açmaq üçün ən yaxın zamanda Beynəlxalq Mülki Aviasiya Təşkilatının (ICAO) ofisinə çatdırılacaq. Bu barədə bazar ertəsi Trend-ə Azərbaycanın Pakistanda və Əfqanıstandakı səfiri Daşqın Şikarov bildirmişdir.
Amerikalı hərbçilərin tapdıqları "qara qutu" artıq Əfqanıstanın Nəqliyyat Nazirliyinə verilib.
Əfqanıstanda qəzaya uğramış "Silk Way" aviaşirkətinin İL-76 4K-AZ 55 yük təyyarəsinin 9 ekipaj üzvünün meyitini hələlik qəza yerindən götürmək mümkün olmayıb.
"Yük təyyarəsinin 9 ekipaj üzvündən 5-i Azərbaycan, digərləri isə Özbəkistan vətəndaşlarıdır. Bütün ekipaj üzvləri həlak olub", - deyə səfir Əfqanıstanın rəsmi şəxslərinə istinadən bildirmişdir.
Bakı-Baqram marşrutu ilə hərəkət edən və saat 21:26-da (yerli vaxtla) havaya qalxan təyyarənin göyərtəsində Heydər Əliyev Beynəlxalq Hava Limanından qəbul etdiyi 18 ton yük olub.
Yük tutumu 40 ton olan təyyarə 2005-ci ildə buraxılmışdır və 2011-ci ilin fevralında tam texniki baxışdan keçib. 2011-ci ilin iyununda o, növbəti texniki baxışdan keçib.