Naxçıvan Muxtar Respublikasında hüquq-mühafizə orqanlarının maddi-texniki bazasının gücləndirilməsi və müasirləşdirilməsi, əməkdaşlar üçün normal iş şəraitinin yaradılması, o cümlədən əhaliyə göstərilən hüquqi xidmətlərin keyfiyyətinin artırılması daim diqqət mərkəzində saxlanılır. 
İyulun 18-də Naxçıvan Muxtar Respublikası Ali Məclisinin sədri Vasif Talıbov Daxili İşlər Nazirliyinin əsaslı təmir olunan inzibati binasına baxmışdır.
Məlumat verilmişdir ki, nazirliyin inzibati binası zirzəmi ilə birlikdə 4 mərtəbədən ibarətdir. İş və xidməti otaqlarda əsaslı təmir işləri aparılmış, qapılar dəyişdirilmiş, otaqlara müasir mebel avadanlıqları və kompyuter dəstləri qoyulmuşdur. Kitabxanada, iclas və müşavirə zalında, kriminalistik tədqiqatlar laboratoriyasında ən yüksək şərait yaradılmışdır. Binanın pilləkənlərinə, dəhlizinə travertin döşənmiş, müasir işıqlandırma və istilik sistemi quraşdırılmışdır.
Əsaslı təmir işləri "Dizayn" Məhdud Məsuliyyətli Cəmiyyəti tərəfindən keyfiyyətlə həyata keçirilmişdir.
Muxtar respublikanın paytaxtı Naxçıvan şəhərinin müxtəlif prospekt və küçələrində avtomobillərin normal hərəkəti, eləcə də təhlükəsizliyi pozmağa cəhd edən şəxslər barədə dərhal məlumat alınması məqsədilə 2008-ci ildə Naxçıvan Muxtar Respublikası Daxili İşlər Nazirliyində Təhlükəsizlik və Hərəkətin İdarə Edilməsi Mərkəzi yaradılmışdır.
Ali Məclisin sədri mərkəzin fəaliyyəti ilə maraqlanmış, təhlükəsizlik tədbirlərinin gücləndirilməsi barədə müvafiq tapşırıqlar vermişdir.
İnzibati binanın həyətində də geniş abadlıq işləri aparılmışdır.