Binəqədi Rayon İcra Hakimiyyəti, Hərbi Komissarlığı, Gənclər və İdman İdarəsinin təşkilatçılığı ilə çağırışyaşlı gənclərin hərbi xidmətə yolasalma mərasimi keçirilmişdir.  
Tədbiri giriş sözü ilə açan rayon hərbi komissarı vəzifəsini icra edən polkovnik-leytenant Mehman Qurbanov hərbi xidmətə çağırışla əlaqədar ölkə Prezidenti tərəfindən verilmiş fərmanın icrası ilə bağlı məlumat vermişdir.
Hərbi xidmətə yola düşən gənclərə nümunəvi xidmət arzulayan rayon icra hakimiyyətinin başçısı Alı Qocayev əsası ulu öndər tərəfindən qoyulmuş və bu gün Ali Baş Komandan, ölkə Prezidenti İlham Əliyevin rəhbərliyi ilə həyata keçirilən ordu quruculuğu sahəsində müsbət uğurların əldə olunduğunu, Ermənistan-Azərbaycan, Dağlıq Qarabağ münaqişəsinin həlli istiqamətində sülh danışıqlarının aparıldığını, eyni zamanda, işğal olunmuş torpaqlarımızın hər an azad edilməsi istiqamətində öz sözünü deməyə qadir qüdrətli ordumuzun yarandığını vurğulamışdır.
Sonra çıxış edənlər - rayon Gənclər və İdman İdarəsinin rəisi Qüdsi Bayramov, Respublika Hərbi Komissarlığının zabiti, kapitan Yasin Aşurov, YAP rayon təşkilatı qadınlar şurasının sədri Məlahət İbrahimova, rayon veteranlar şurasının sədri Telman Hətəmov, şəhid anası Dilarə Cabbarova və digərləri hərbi xidmətə yola düşən gənclərə uğurlu yol, nümunəvi xidmət arzulamışlar.
Sonda gənclərə təşkilatçılar tərəfindən içərisində gündəlik gigiyenik vasitələr olan bağlamalar təqdim olunmuşdur.
Tədbir Binəqədi rayon mədəniyyət evinin musiqi kollektivinin ifasında konsert proqramı ilə yekunlaşmışdır.

Vaqif BAYRAMOV, "Xalq qəzeti"