Azərbaycan Diasporunun Almaniyadakı Mərkəzi Şurası ermənilərin Dağlıq Qarabağa aid buraxdıqları dəmir pulların satışının dayandırılması ilə əlaqədar Almaniyada fəaliyyət göstərən tanınmış "Ebay", "Emuenzen" və "Pfalzmuenzen" şirkətlərinə etiraz məktubu göndərmişdir. 
Bir neçə gün bundan əvvəl Mərkəzi Şuranın rəhbəri qeyd edilən şirkətlərin saytlarında ermənilərin Dağlıq Qarabağa aid buraxdıqları xırda pulların satışına dair elanın şahidi olmuşdur. 1- 5 dram, 50 luma dəyərlərində olan pulların üzərində ingilis dilində "Nagorno-Karabakh Republic", erməni dilində "Dağlıq Qarabağ Respublikası" və zərfin üzərində almanca "Nagornz Karabach" sözləri yazılmışdır. Pulların üzərində, həmçinin Dağlıq Qarabağın Ermənistana aid olduğu, Qarabağ dramının 2005-ci ildən istifadəyə verilərək Ermənistan dramı ilə birə-bir dəyişdirilə bilməsi haqqında ayrıca məlumat verilmişdir.
Məsələ ilə bağlı Mərkəzi Şuranın etiraz məktubunda bildirilir ki, ermənilərin bu hərəkəti alman xalqına və numizmatlara yanlış məlumatların verilməsinə, iki ölkə arasında gərginliyin daha da artmasına xidmət edir. Qeyd edilir ki, Ermənistan-Azərbaycan, Dağlıq Qarabağ münaqişəsinin həlli ilə bağlı ümidverici addımların atıldığı bir vaxtda numizmatika yolu ilə belə bir çirkin siyasətin aparılması yolverilməzdir.
Etiraz məktubunda Dağlıq Qarabağa aid buraxılan pulların satışının dayandırılması və internet saytlarından çıxarılması tələb olunmuşdur.

AzərTAc