Bu sözləri Dini Qurumlarla İş üzrə Dövlət Komitəsinin sədri Hidayət Orucov demişdir.
H. Orucov bildirmişdir ki, Azərbaycanda dini etiqad azadlığı həmişə təmin olunmuşdur. Ölkəmizdə tarixən mövcud olmuş tolerantlıq ənənələrinin daha da möhkəmlənməsi və gücləndirilməsi istiqamətində dövlətimizin başçısı perspektivli siyasət aparır. Artıq dünya birliyi bu həqiqəti etiraf etmək məcburiyyətində qalır ki, Azərbaycan xaricə yalnız neft qaz deyil, eyni zamanda tolerantlıq ənənələrini ixrac edə bilər.
Dini Qurumlarla İş üzrə Dövlət Komitəsinin sədri demişdir ki, xaricdə yaşayan soydaşlarımız daim diqqət mərkəzindədir. Biz soydaşlarımızdan çoxlu məktublar alırıq. Soydaşlarımızın yaşadığı ölkələrin müvafiq dövlət qurumları ilə əlaqələr saxlayırıq. İndiyədək bir neçə ölkədə yaşayan azərbaycanlılar tərəfindən Qafqaz Müsəlmanları İdarəsinə (QMİ) həmin ölkələrdə bu dini mərkəzin nümayəndəliyinin açılması ilə bağlı müraciətlər daxil olmuşdur. Onları həll etmək istiqamətində fəaliyyət göstəririk.
Gələcəkdə QMİ-nin xarici ölkələrdə nümayəndəliklərini açmağı planlaşdırırıq.

AzərTAc