Bakı Biznes Mərkəzində İqtisadi İnkişaf Nazirliyinin nümayəndələri Azərbaycan paytaxtında keçirilmiş Dünya Azərbaycanlılarının III Qurultayının bir qrup iştirakçısı ilə görüşmüşlər.
İqtisadi İnkişaf Nazirliyi Aparatının rəhbəri Samir Vəliyev Azərbaycan diasporunun nümayəndələrinə ölkə iqtisadiyyatı, qazanılmış uğurlar və iqtisadiyyatın inkişaf perspektivləri, həmçinin təmsil etdiyi qurumun fəaliyyət istiqamətləri barədə geniş məlumat vermişdir.
Nazirliyin mətbuat xidmətindən bildirmişlər ki, görüşdə iştirak edən diaspor nümayəndələri ölkəmizin beynəlxalq əlaqələrinin daha da genişlənməsi, yaşadıqları xarici ölkə şəhərləri ilə Azərbaycan şəhərlərinin qardaşlaşması, iqtisadi və mədəni sahələrdə əməkdaşlığın daha da inkişafı, xarici ölkələrdə həyata keçirilən layihələrdə Azərbaycan iş adamlarının iştirakı məsələləri ilə bağlı təkliflər səsləndirmişlər.
Təkliflərlə bağlı müzakirələr aparılmış, İqtisadi İnkişaf Nazirliyinin məsul əməkdaşları qurumun səlahiyyətləri çərçivəsində Azərbaycan diasporu nümayəndələrinin təkliflərinin nəzərə alınacağını və reallaşdırılması üçün lazımi dəstək göstəriləcəyini bildirmiş, qonaqları maraqlandıran sualları cavablandırmışlar.

AzərTAc