SİA-ya açıqlamasında Milliyyətçi Hərəkat Partiyasının sədr müavini Tuğrul Türkeş demişdir: "Bütün dünyada həm Azərbaycan, həm də Türkiyə əleyhinə yalan xəbərlər yayılır.
Bu dezinformasiyaya qarşı həqiqətlərin dünyaya çatdırılması baxımından Türkiyə və Azərbaycan diasporunun birgə fəaliyyətini müsbət qiymətləndiririk. Eyni zamanda birgə fəaliyyət 21-ci əsrdə inkişaf edən ölkələr olan Azərbaycan və Türkiyənin dünyada özünü tanıtmağında da önəmli bir rol oynayacaq". Dünya Azərbaycanlılarının III Qurultayının keçirilməsinin böyük əhəmiyyətini vurğulayan MHP-nin sədr müavini bildirib ki, diaspor nümayəndələrinin bir yerə toplaşması çox mühüm amildir: "Mən yenə də təkrar etmək istəyirəm ki, dünyada həm Azərbaycan, həm də Türkiyə türkləri yalan xəbər və dezinformasiya ilə üzləşirlər. Bu mənada Dünya azərbaycanlılarının qurultayının keçirilməsi önəmli hadisədir. Qurultaydan sonra diaspor nümayəndələrinin gələcək fəaliyyətini səbirsizliklə gözləyəcəyik. Çünki qarşıda görüləsi işlər çoxdur".