ABŞ Konqresində Texas ştatını təmsil edən senator Con Kornin ABŞ Azərbaycanlıları Şəbəkəsinin (USAN) Ermənistan-Azərbaycan, Dağlıq Qarabağ münaqişəsinin tənzimlənməsi barədə məktubuna cavab vermişdir. 
AzərTAc USAN-a istinadla xəbər verir ki, senator cavab məktubunda Şəbəkənin nümayəndəsinə onu Dağlıq Qarabağ münaqişəsi haqqında məlumatlandırdıqlarına görə təşəkkürünü bildirir.
Məktubda deyilir: "Dağlıq Qarabağ münaqişəsinin tənzimlənməsi məsələsinə dair mənimlə əlaqə yaratdığınıza görə sağ olun. Məlum olduğu kimi, Dağlıq Qarabağ münaqişəsinin tənzimlənməsi ilə əlaqədar, Ermənistanla Azərbaycan arasında vasitəçilik missiyası ilə ATƏT məşğul olur. ABŞ Dağlıq Qarabağ münaqişəsinin dinc yolla tənzimlənməsi prosesini dəstəkləməkdə davam etməlidir. Əmin ola bilərsiniz ki, Dağlıq Qarabağ regionu ilə əlaqədar Konqresdə müzakirələr aparılarkən mən sizin təkliflərinizi nəzərə alacağam".