Azərbaycanda 2011-ci ilin "Turizm ili" elan olunması bu sahənin inkişafına təkan vermişdir. İl ərzində Bakıda beşulduzlu 5 yeni beynəlxalq şəbəkə hotelinin fəaliyyətə başlayacağı gözlənilir.
Mədəniyyət və Turizm Nazirliyindən bildirmişlər ki, bu hotellərdən biri - "Marriott İnternational" şəbəkəsinə məxsus olan "JW Marriott Absheron Baku" hoteli cari ilin sonunda ilk qonaqlarını qəbul edəcəkdir.
Bu mehmanxana Bakının Azadlıq meydanında, keçmiş "Abşeron" hotelinin yerində inşa edilir. Hotelin çoxsaylı restoran və barları qonaqların xidmətində olacaqdır. Mehmanxanada qonaqların istirahəti üçün təmtəraqlı spa-salon, fitnes mərkəzi və 22-ci mərtəbədə hovuz fəaliyyət göstərəcəkdir. Bundan əlavə, mehmanxanada müşavirələr keçirilməsi üçün 1800 kvadratmetr sahə, o cümlədən pəncərələri Azadlıq meydanına açılan geniş (1200 kvadratmetr), sütunsuz salon nəzərdə tutulmuşdur.
Qeyd edək ki, "JW Marriott" lüks brendi 2012-ci ilin sonunadək ayrı-ayrı ölkələrdə 12 yeni hotel açmağı planlaşdırır. Beləliklə, "JW Marriott"un dünyanın 27 ölkəsində 64 hoteli və kurortu olacaqdır.