2011-ci il iyunun 22-də Böyük Vətən müharibəsinin başlanmasının 70-ci ildönümü ilə əlaqədar "Mir" teleradio şirkəti Bakıda "Mənim yaddaş növbəm" adlı aksiya keçirəcəkdir. "Mir" teleradio şirkətindən verilən məlumata görə bu aksiya səhər saat 5-də Sovet İttifaqı Qəhrəmanı Mehdi Hüseynzadənin abidəsi qoyulmuş parkda başlanacaqdır. 
Xatırladaq ki, elə həmin vaxtda Moskva, Almatı, Bişkek, Düşənbə, Minsk, Sankt-Peterburq, Tbilisi və digər şəhərlərdə də aksiya keçiriləcəkdir. "Mir" telekanalı bu aksiyada iştirak edən bütün şəhərləri əlaqələndirən telekörpü vasitəsilə birbaşa translyasiya təşkil edəcəkdir.
Mahiyyət etibarilə "Mənim yaddaş növbəm" aksiyası fleşmobdur. Müxtəlif şəhərlərdə və müxtəlif ölkələrdə yaşayan insanlar eyni vaxtda şamlar yandıraraq müharibəni yad edəcəklər. Bu tədbiri hər kəs öz evində də keçirməklə həmin müharibədə iştirak etmiş - cəbhədə döyüşmüş və ya arxa cəbhədə çalışmış qohumlarını və yaxınlarını yad edə bilər. Aksiya iştirakçılarının toplaşdığı əsas yerlər memorial komplekslər və Əbədi məşəl yandırılan meydanlar olacaqdır.
Aksiyanın saytında (vahta-pamyati.ru) hər kəs öz qohumlarının və yaxınlarının igidlikləri haqqında hekayələr yerləşdirə bilər. Bu barədə əhvalatları [email protected] ünvanına göndərmək olar. Ən yaxşı hekayələrin müəllifləri "Mir" Dövlətlərarası Teleradio Şirkətindən mükafatlar alacaqlar. Birinci mükafat bu teleradio şirkəti ilə 600.000 rubl məbləğində kontrakt, yaxud qalibin seçimi əsasında Brestə səfər olacaqdır.

AzərTAc