BSANNA-nın Bakı toplantısı regionun xəbər agentliklərinə əməkdaşlıq etmək və ideyaları paylaşmaq üçün çox yaxşı imkan yaratmışdır.
AzərTAc bu əməkdaşlığı inkişaf etdirmək üçün böyük iş görmüşdür. Bu tədbir xəbər agentliklərinə gələcəkləri ilə bağlı fikirlərin mübadiləsi üçün yaxşı şans vermişdir. Bizim qurumun da burada təmsil olunmasını agentliyimizin gələcək inkişafı üçün çox vacib amil hesab edirəm.
Bu sözləri Qara Dəniz İqtisadi Əməkdaşlıq Təşkilatının (QİƏT) üzvü olan ölkələrin Milli İnformasiya Agentlikləri Assosiasiyasının (BSANNA) AzərTAc-ın ev sahibliyi ilə Bakıda keçirilmiş V Baş Assambleyasının iştirakçısı, Yunanıstanın ANA-MPA xəbər agentliyinin multimedia, elm-texnika və maliyyə xəbərləri şöbəsinin rəhbəri Petros Demetropoulas jurnalistlərə müsahibəsində demişdir.
Yunan agentliyinin təmsilçisi qeyd etmişdir ki, regionun hər bir agentliyi informasiya mübadiləsini, əməkdaşlığı inkişaf etdirməlidir. O bildirmişdir ki, belə toplantıların keçirilməsi məhz bu baxımdan böyük əhəmiyyət kəsb edir.

AzərTAc