Rusiyanın İrkutsk şəhərində MDB dövlətlərinin Gömrük Xidməti Rəhbərləri Şurasının 53-cü iclası keçirilmişdir.Tədbirdə Azərbaycanın Dövlət Gömrük Komitəsinin sədri, gömrük xidməti general-leytenantı Aydın Əliyevin rəhbərlik etdiyi nümayəndə heyəti iştirak etmişdir.
İclasın gündəliyinə uyğun olaraq Şuranın 52-ci iclasında qəbul olunmuş qərarların icra vəziyyəti haqqında məlumat verilmişdir.
Daha sonra 2015-ci ilədək müddətdə Rusiya Gömrük Akademiyasının bazası əsasında MDB iştirakçı dövlətlərin gömrük xidmətləri üçün kadrların ixtisasyönümlü hazırlanması barədə Konsepsiya təsdiq edilmiş və müzakirə edilmək üçün Şuranın növbəti iclasına tapşırılmışdır.
İclasda Şuranın işindəki fəal iştirakına görə və MDB-nin yaradılmasının 20 illiyi münasibətilə A.Əliyev "MDB iştirakçı dövlətlərin gömrük əməkdaşlığının möhkəmləndirilməsinə görə" döş nişanı ilə təltif edilmiş və bu barədə qərar imzalanmışdır.
İclas çərçivəsində A.Əliyev Moldova və Ukrayna gömrük xidmətinin rəhbərləri ilə ikitərəfli görüşlər keçirmiş, gömrük işi sahəsində qarşılıqlı maraq kəsb edən bir sıra perspektiv məsələlər barədə fikir mübadiləsi aparmışdır.