Bakının Yasamal rayonu ərazisində xarici ölkələrin vətəndaşlarına qarşı zor tətbiq etmiş cinayətkar dəstənin axtarışı davam edir.
Daxili İşlər Nazirliyinin mətbuat xidmətindən bildirmişlər ki, iyunun 15-dən 16-na keçən gecə saat 00.20 radələrində paytaxtın Yasamal rayonundakı Vidadi küçəsində dörd nəfər naməlum şəxs tərəfindən Böyük Britaniya vətəndaşı Celia Devies və ABŞ vətəndaşı Amanda Eriksona qarşı zor tətbiq edilməklə döyülmələri barədə rayon polis idarəsinə məlumat daxil olmuşdur.
Bununla əlaqədar həmin gün idarənin istintaq şöbəsində Azərbaycan Respublikası Cinayət Məcəlləsinin 221.2.1-ci (bir qrup şəxs tərəfindən törədilən xuliqanlıq) maddəsi ilə cinayət işi başlanmışdır.
Cinayətdən zərər çəkmiş şəxslər dindirilmiş, onu törədənlərin fotorobotları tərtib olunmuş və məhkəmə-tibbi ekspertizası təyin edilmişdir.
Cinayətin açılması və icraçılarının müəyyən edilib tutulması üçün Daxili İşlər Nazirliyinin və Bakı Şəhər Baş Polis İdarəsinin təcrübəli əməkdaşlarından ibarət istintaq-əməliyyat qrupu yaradılmış və intensiv tədbirlər həyata keçirilir.
Bu istiqamətdə görülən işlər nazirliyin rəhbərliyinin nəzarətindədir.