Ombudsmanların IX Bakı Beynəlxalq konfransının "Milli azlıqların və miqrantların mədəni hüquqları: hüquqi aspektlər və implementasiya" mövzusuna həsr edilməsi bu gün miqrasiya proseslərinin böyük bir problem olduğunu bir daha təsdiq edir.
Bu sözləri Dövlət Miqrasiya Xidmətinin rəisi Arzu Rəhimov bildirmişdir.
Ölkəmizdə baş verən miqrasiya proseslərinin tənzimlənməsi və miqrantların hüquqlarının təmin edilməsindən danışan A.Rəhimov demişdir ki, Azərbaycanda miqrasiya proseslərinin idarə olunmasına, bu sahədə dövlət nəzarətinin təmin olunmasına xüsusi diqqət yetirilir. Bu gün Azərbaycanda 450 minə yaxın miqrant yaşayır. Onlar arasında Azərbaycan vətəndaşları ilə nikahda, yaxın qohumluq əlaqəsində olanlar, ali təhsil alanlar da vardır.
Azərbaycana gələn əcnəbilərin bir hissəsini də əməkçi miqrantlar təşkil edir. Daxili əmək bazarını qorumaq şərti ilə miqrantlara da əmək fəaliyyəti ilə məşğul olmaq üçün icazələr verilir və onların fəaliyyəti daim nəzarətdə saxlanılır.