Azərbaycanın NATO yanında nümayəndəliyinin rəhbəri, səfir Xəzər İbrahim iyunun 17-də NATO-nun baş katibi Anders Foq Rasmussen tərəfindən qəbul edilib. 
Nümayəndəlikdən APA-ya verilən məlumata görə, NATO baş katibi Azərbaycanın NATO ilə güclü tərəfdaşlığını, xüsusən də Əfqanıstanda Beynəlxalq Təhlükəsizliyə Yardım Qüvvələri (ISAF) əməliyyatına töhfəsini təqdir edib.
Öz növbəsində, X. İbrahim Azərbaycanın Alyansla uzun və səmərəli əməkdaşlıq tarixini vurğulayıb və Əfqanıstan üçün zəruri olan təlim imkanlarının təqdim edilməsi üzrə son dövrdəki səyləri qeyd edib. Səfir, həmçinin regional məsələlər üzrə qiymətləndirməsini baş katibin diqqətinə çatdırıb.
A. Rasmussen NATO-nun Azərbaycanla tərəfdaşlığının daha da inkişafını arzuladığını bildirib.