AzərTAc heç vaxt təkzib verməyən agentlikdir. Biz ona Azərbaycanla bağlı olan dəqiq, qərəzsiz xəbərlərin mənbəyi kimi baxırıq. 
Bu sözləri Bakıda Qara dəniz İqtisadi Əməkdaşlıq Təşkilatının üzvü olan ölkələrin Milli İnformasiya Agentlikləri Assosiasiyasının - BSANNA-nın V Baş Assambleyasında iştirak edən Anadolu Agentliyinin baş direktorunun müavini Ahmet Tek AzərTAc-a verdiyi eksklüziv müsahibəsində demişdir.
Beynəlxalq informasiya məkanında agentliklərin rolundan danışan Ahmet Tek, dünyanın bir çox ölkələrində, o cümlədən Türkiyədə Azərbaycanla bağlı dövlət səviyyəsində olan xəbərlərin istinad mənbəyinin AzərTAc olduğunu vurğulamışdır: "Aldığımız hər hansı bir xəbərin düzgünlüyünü yoxlamaq üçün onu Azərbaycanın bütün agentlikləri yaymış olsa belə, ən son istinad mənbəyimiz AzərTAc-dır. AzərTAc heç vaxt təkzib verməyən bir agentlikdir. Biz ona Azərbaycanla bağlı dəqiq, qərəzsiz xəbərlərin mənbəyi kimi baxırıq".