Cari ilin əvvəllərindən etibarən Bakı şəbəkə rayonu üzrə xüsusilə paytaxtın enerji təminatının sabitliynin və dayanıqlığının təmin edilməsi məqsədilə bir sıra enerji obyektlərində sistem əhəmiyyətli təmir-bərpa işləri həyata keçirilmişdir. Növbəti payız-qış mövsümünə hazırlıq məqsədi daşıyan bu kimi tədbirlər hazırda da davam etdirilir.
Abşeron Regional Elektrik Şəbəkəsi üzrə görülmüş işlər də bu baxımdan diqqəti cəlb edir. "Azərenerji" ASC-nin mətbuat xidmətindən aldığımız məlumata görə, 500 kilovoltluq "Abşeron" yarımstansiyasında 330 kV-lik 4-cü "Şirvan" hava xəttinin gərginlik və cərəyan transformatoru, boşaldıcısı və xətt ayrıcısı təmir edilmişdir. Eyni zamanda, 800 MVA-lıq 2 saylı avtotransformatorun elektrik avadanlıqlarında da müxtəlif təyinatlı yenidənqurma və təmir işləri görülmüşdür. Bundan əlavə, 220 kV-lik "Xırdalan" yarımstansiyasında hər biri 16 MVA olan 4 və 5 saylı transformatorlar, ümumi gücü 1590 KVA olan 1, 2 və 3 saylı xüsusi sərfiyyat transformatorları təmir edilmişdir. Həmçinin 220 kV-lik 4-cü "Abşeron", 110 kV-lik 1-ci "Binəqədi", 3 -cü və 4-cü "Buta", eləcə də "Xırdalan" hava xətlərinin elektrik avadanlıqlarında da təmir işləri həyata keçirilmişdir.
220 kV-luq "Səngəçal", 110 kV-luq "Binəqədi", "Puta" və "205" yarımstansiyalarında görülən işlər də bu tədbirlər sırasına aid edilir. İlin əvvəlindən bu yarımstansiyalarda müxtəlif təyinatlı yenidənqurma işləri həyata keçirilmişdir. Eyni zamanda, "Binəqədi" yarımstansiyasında 110 kV-lik II və IV "Binəqədi" hava xətlələri, 63 MVA-lıq 1 saylı transformatoru da SKADA sxeminə qoşulmuşdur. Şəhərin mərkəzi hissəsinin enerji təchizatının dayanıqlığının daha da möhkəmləndirilməsi məqsədilə 220 kV-lik "Müşfiq" yarımstansiyasında konkret tədbirlər həyata keçirilir. Belə ki, burada elektrik avadanlıqlarında aparılan müxtəlif təyinatlı təmir işləri ilə yanaşı, 3 saylı avtotransformatorun soyutma sisteminin idarə edilməsi siyirtməsi bərpa edilmiş, VI "Abşeron" hava xətti, hər birinin gücü 250 MVA olan 1 və 2 saylı avtotransformatorların mühafizə, ölçü cihazlarının dövrələri SKADA sxeminə qoşulmuşdur.
Müəssisənin balans mənsubiyyətinə aid olan hava elektrik verilişi xətlərində də bir sıra təmir-bərpa işlərinin yerinə yetirlməsini bildirən mənbənin məlumatına görə, 220 kV-lik I "Şirvan" hava xəttində ildırımötürücü buraz təmir edilmiş, sınıq və sıradan çıxmış avadanlıqlar yenisi ilə əvəz edilmişdir. Eyni zamanda, 220 kV-lik "Ağsu" hava xəttində deformasiyaya uğramış dəmir aralıq dayağın yerinə yeni 2 ədəd dəmir-beton dayaq quraşdırılmış, digər anker dayaqlarda ilgəklər və xətt armaturları təftiş edilmişdir. 110 kV-lik I "Ələt" hava xəttində mövcud aralıq ağac dayaq isə dəmir-beton dayaqla əvəzlənmişdir. Burada eyni zamanda, digər fiziki və mənəvi aşınmış avadanlıqların dəyişdirilməsi işləri də yerinə yetirilir. Məsələn, IV "Puta", I "Hövsan", II "Xırdalan" və digər hava elektrik verilişi xətləri üzrə yerləşən dayaqlardakı izolyator zəncirlərinin və bərkidici qovşaqların bərpası, məftillərin təmiri, torpaqlama konturlarının yeniləri ilə əvəz edilməsi buna bariz nümunədir.
Göründüyü kimi, təmir-bərpa işləri Bakı və paytaxtətrafı zonaların enerji təhlükəsiziliynin yüksək səviyyədə təmin edilməsi istiqamətində atılan mühüm addımdır və bu işlər ilin qalan dövrü ərzində də davam etdiriləcəkdir.

M. YAQUBZADƏ, "Xalq qəzeti"