Qazaxıstan Prezidenti Nursultan Nazarbayevin fərmanı ilə Azərbaycanın bu ölkədəki səfiri Lətif Qəndilov "Dostluq" ordeni ilə təltif edilmişdir.
Dövlət katibi-xarici işlər naziri Kanat Saudabayev mükafatın təqdim edilməsi mərasimində bildirmişdir ki, Azərbaycanın Qazaxıstandakı səfiri bu mükafata diplomatik fəaliyyəti ərzində ölkələrimiz arasında dostluq münasibətlərinin möhkəmlənməsində və ikitərəfli əlaqələrin inkişafında göstərdiyi xidmətlərə görə layiq görülmüşdür.
Qazaxıstan ilə Azərbaycan arasında dostluq və qardaşlıq əlaqələrinə toxunan dövlət katibi, bu münasibətlərin tarixi köklərə əsaslandığını bildirmiş və yüksək mükafatı səfirə təqdim etmişdir.
Lətif Qəndilov ali mükafata görə minnətdarlığını bildirmiş və bu təltifi Azərbaycan dövlətinə, xalqına və Prezidentinə yüksək hörmət və ehtiramın təsdiqi kimi dəyərləndirmişdir.
Səfir Azərbaycan-Qazaxıstan dostluq münasibətlərinin əsasının ümummilli liderimiz Heydər Əliyev və Prezident Nursultan Nazarbayev tərəfindən qoyulduğunu xüsusi vurğulamış, bu münasibətlərin Prezident İlham Əliyev tərəfindən daha da inkişaf etdirildiyini diqqətə çatdırmışdır.

Qulu KƏNGƏRLİ, AzərTAc-ın xüsusi müxbiri
Astana