Düşmənlə üzbəüz təmas xəttində yerləşən rayonlarda Rabitə və İnformasiya Texnologiyaları Nazirliyi tərəfindən telekommunikasiya və poçt rabitəsinin, radio-televiziya yayımının, internet xidmətlərinin günün tələbləri səviyyəsində təşkili üçün tədbirlər davam etdirilir. 
Nazirlikdən bildirmişlər ki, sərhəd bölgələrində əhalinin rabitə xidmətlərinə və radio, televiziya yayımına tələbatın öyrənilməsi məqsədi ilə rabitə və informasiya texnologiyaları nazirinin müavini İltimas Məmmədov nazirliyin müvafiq qurumlarının rəhbərləri ilə Ağdam rayonunun Quzanlı qəsəbəsinin Qaradağlı, Rzalar, Çəmənli, Xındırıstan kəndlərində rabitənin təşkilinə baxış keçirmişlər.
Quzanlıda yeni "Rabitə evi"nin tikintisi, qeyd olunan yaşayış məntəqələrində rabitə xidmətlərinin göstərilməsi vəziyyəti və radio, televiziya yayımının səviyyəsinə dair təklif və rəylər Ağdam Rayon İcra Hakimiyyətinin (İH) başçısı Nizami Sadıqovun iştirakı ilə müzakirə edilmişdir.
Yerlərdən verilmiş təkliflər və İH-də aparılmış müzakirə nəzərə alınaraq, telekommunikasiya, internet və poçt xidmətlərinin, radio-TV yayımının keyfiyyətinin və əhatəsinin artırılması üçün tədbirlər planı hazırlanaraq, həyata keçirilməsi qərara alınmışdır.

AzərTAc