Rusiya Prezidenti Dmitri Medvedev bildirmişdir ki, Azərbaycanda rus dilini inkişaf etdirmək üçün çox iş görülür. 
AzərTAc Rusiya Prezidentinin rəsmi saytına istinadla xəbər verir ki, Dmitri Medvedev iyunun 6-da - Aleksandr Sergeyeviç Puşkinin ad günündə şairin adını daşıyan Dövlət Rus Dili İnstitutunda olmuşdur.
Rusiya dövlətinin başçısı elm-təhsil cəmiyyətinin, Rusiya dilçiləri birliklərinin, "Russkiy mir" Fondunun əməkdaşları, gənc rusistlər, rus dilinin qlobal şəbəkədə təbliği üzrə mütəxəssislərlə görüşmüşdür. D.Medvedev görüş əsnasında iyunun 6-nın Rus Dili Günü elan olunması haqqında Fərman imzaladığını açıqlamışdır.
Müstəqil Dövlətlər Birliyi ölkələrində rus dilinə marağın artması məsələsinin müzakirəsi zamanı Prezidentə məlumat verilmişdir ki, Azərbaycanda rus dilində tədris aparılan məktəblərin sayı artır. Prezident isə əlavə etmişdir: "Elədir ki var. Azərbaycanda çox iş görürlər".