ABŞ-ın Kaliforniya ştatının Oranj Kaunti dairəsinin Rəhbərlər Şurası mayın 28-ni Azərbaycanın Milli bayram günü elan etmişdir. 
Şuranın sədri Bill Kampbelin bu barədə imzaladığı proklamasiyada qeyd edilir ki, 1918-ci il mayın 28-də əsası qoyulmuş Azərbaycan Xalq Cümhuriyyəti İslam dünyasında ilk dünyəvi dövlət olmuşdur. Sənəddə həmçinin qeyd edilir ki, BMT Qarabağ regionu və Naxçıvan eksklavı da daxil olmaqla, sahəsi 33.440 kvadratmilə bərabər olan Azərbaycan Respublikasının ərazi bütövlüyünü tanımışdır.
Qeyd etmək lazımdır ki, Oranj Kaunti dairəsi əhalinin sıxlığına görə ABŞ-da 6-cı, Kaliforniya ştatında 3-cü yeri tutur. Dairənin iqtisadiyyatı müstəqil dövlətlər arasında dünyada 30-cu yeri tutur. Oranj Kaunti ermənilərin ən çox cəmləşdiyi ərazilərdən biridir.