Azərbaycanın xarici işlər naziri Elmar Məmmədyarov ABŞ-a işgüzar səfəri çərçivəsində mayın 31-də Nyu-Yorkda BMT-nin baş qərargahında təşkilatın baş katibi Pan Gi Mun ilə görüşmüşdür.
Xarici İşlər Nazirliyinin mətbuat xidmətindən bildirmişlər ki, görüşdə P.G.Mun BMT ilə Azərbaycan arasında yüksək səviyyəli əməkdaşlıqdan məmnunluğunu ifadə etmişdir.
Azərbaycan Prezidenti İlham Əliyevin salamlarını çatdıran E.Məmmədyarov Ermənistan-Azərbaycan, Dağlıq Qarabağ münaqişəsinin nizamlanması ilə bağlı danışıqlar prosesi barədə baş katibə ətraflı məlumat vermişdir.
P.G.Mun münaqişənin sülh yolu ilə tezliklə həllinin vacibliyini vurğulamışdır.
E.Məmmədyarov BMT-nin Təhlükəsizlik Şurasının 2012-2013-cü illər üçün qeyri-daimi üzvlüyünə cari ilin oktyabrında keçiriləcək seçkilərdə Azərbaycanın namizədliyinin irəli sürüldüyünü, ölkəmizin namizədliyi ilə bağlı nəzərəçarpan üstünlükləri baş katibin diqqətinə çatdırmışdır.