Azərbaycanda son bir neçə ay ərzində korrupsiyaya qarşı mübarizə istiqamətində səylər əhəmiyyətli dərəcədə genişlənmişdir. Bu mübarizə həm inzibati forma və metodlarla, həm də qanunvericilik bazasının təkmilləşdirilməsi ilə aparılır. 
Bu sözləri Yeni Azərbaycan Partiyası (YAP) sədrinin müavini-icra katibi, Milli Məclisin deputatı Əli Əhmədov jurnalistlərə müsahibəsində demişdir.
Ə.Əhmədov bildirmişdir ki, Azərbaycan korrupsiya və digər xoşagəlməz hallara qarşı mübarizənin önündə gedən dövlətlərdən birinə çevrilmişdir. Bu siyasət bundan sonra da davam etdiriləcəkdir.
YAP sədrinin müavini onu da qeyd etmişdir ki, Azərbaycanda korrupsiya və digər xoşagəlməz halların mövcudluğu bəzi mətbu orqanlarda məqsədli şəkildə təqdim olunan kimi deyildir.