Mayın 23-də Məhkəmə-Hüquq Şurasının növbəti iclası keçirilmişdir. 
Fikrət Məmmədovun sədrliyi ilə keçirilən iclasda Şuranın Korrupsiyaya qarşı mübarizə sektorunun məlumatı dinlənilmişdir.
Qeyd edilmişdir ki, Prezident İlham Əliyevin məhkəmə fəaliyyətində korrupsiyaya qarşı mübarizə ilə bağlı tapşırıqlarına əsasən Məhkəmə-Hüquq Şurası ardıcıl və məqsədyönlü tədbirlər həyata keçirir. Korrupsiyaya şərait yaradan hallara yol verdiklərinə görə təkcə son aylar ərzində 2 hakimin səlahiyyətlərinə vaxtından əvvəl xitam verilmiş, habelə 7 hakim barədə intizam icraatı başlanılmışdır.
Şuradan bildirmişlər ki, iclasda, həmçinin vətəndaşlardan Məhkəmə-Hüquq Şurasına daxil olan müraciətlər təhlil edilmiş, əsas narazılıq doğuran hallar və onların aradan qaldırılması üzrə əlavə tədbirlər müzakirə olunmuşdur.
Eyni zamanda, iclasda qanunvericiliyin tələblərinin pozulmasına yol verdiklərinə görə 1 hakimin intizam məsuliyyətinə cəlb edilməsi, 1 nəfərin isə barəsində intizam icraatının başlanılması qərara alınmışdır.