Yol-nəqliyyat hadisələrində xəsarət alanlara ilkin yardım göstərilməsi məqsədi ilə Fövqəladə Hallar Nazirliyində avtomobillərlə növbəli xidmət yaradılmışdır. 
Bunu jurnalistlərə müsahibəsində fövqəladə hallar naziri, general-polkovnik Kəmaləddin Heydərov demişdir.
Nazir bildirmişdir ki, respublikanın magistral və digər yollarında baş vermiş hər hansı yol-nəqliyyat hadisəsi zamanı yaralılara ilkin yardım göstərmək, onları xilas etmək üçün biz 5 magistral yolda növbəli xidmət təşkil etmişik. Xidmət artıq bu gündən fəaliyyətə başlamışdır. Avtomobillərlə növbəli xidmət nazirliyin Dövlət Yanğından Mühafizə və Xüsusi Riskli Xilasetmə xidmətlərinin, regional mərkəzlərin, həmçinin digər qurumların xilasedicilərindən ibarətdir. Xidmət Azərbaycanın bütün bölgələrinin magistral yollarında, Bakı şəhərinin və Abşeron yarımadasının bütün girişlərində yerləşdiriləcəkdir. Burada xüsusi texnika ilə təchiz olunmuş avtomobillər xidmət edəcəkdir.
Bu yeniliyi tətbiq edəndən sonra hər hansı bir avtomobil qəzası üzrə xilasetmə işlərində keyfiyyət daha da yüksələcək və yaralılar az zərər çəkəcəkdir. Xidmət aparan nəqliyyat vasitələri müasir texnika ilə təchiz edilmişdir.