Heydərabad qəsəbəsində aparılan quruculuq işlərinin tərkib hissəsi kimi ötən il 16 yeni fərdi ev inşa olunmuş, 40 fərdi ev isə yenidən qurulmuşdur. Bu işlər cari ildə də davam etdirilmişdir.
Naxçıvan Muxtar Respublikası Ali Məclisinin sədri Vasif Talıbov mayın 6-da Heydərabad qəsəbəsində 6 mənzilin orderini sahiblərinə təqdim etmişdir.
Qəsəbə sakinləri adından çıxış edən Hüseyn Əsgərov Sədərək rayonunun sosial-iqtisadi inkişafı, əhalinin maddi rifah halının yaxşılaşdırılması istiqamətində həyata keçirilən tədbirlərə, onlara göstərilən diqqət və qayğıya görə minnətdarlığını bildirmişdir.
Yeni inşa olunan və yenidən qurulan fərdi evlər ikimərtəbəlidir. Evlərin birinci mərtəbəsində mətbəx, salon, ikinci mərtəbəsində isə 3 otaq vardır. Evlərin hər birinin ümumi həyətyanı sahəsi 1000 kvadratmetrdir. Bu sahə sakinlərin təsərrüfat işləri ilə məşğul olmaları üçün nəzərdə tutulmuşdur. Evlərə telefon, qaz, elektrik və su xətləri çəkilmiş, ərazidə abadlıq işləri aparılmış, yaşıllıqlar salınmışdır.