Zaqatalada xalqımızın tarixi qədər qədim, müqəddəs və əziz el bayramı – Novruz  münasibəti ilə bir sıra tədbirlər keçirilmişdir.

Novruz  şənliyinin əvvəlində Bahar qızı, Kosa və Keçəl faytonla zurna nağaranın musiqi sədaları altında rayonun girəcəyindən şənliyin keçirildiyi Zaqatala qalasına doğru hərəkət etmişlər. Yolboyu zaqatalalıları salamlayan Bahar qızı yurdumuza yazın gəlişi münasibəti ilə onları təbrik etmiş, hamını el şənliyinə səsləmişdir.

İlk öncə  bu tarixi məkanda keçirilən el şənliyində bayram tonqalı qalanmış, rəsm əsərləri, sənətkarlıq nümunələrinin sərgisi təşkil olunmuş, qədim adət-ənənələrimiz nümayiş etdirilmiş, at yarışları tədbirin rəngarəngliyini daha da artırmışdır. Bayram tədbirlərində incəsənət ustalarının, özfəaliyyət kollektivlərinin, kəndirbazların və pəhləvanların çıxışları, eləcə də ayrı-ayrı kəndlərimizin milli adət-ənənələri, mətbəxləri nümayiş etdirilmişdir.

Tədbirdə çıxış edən Zaqatala Rayon İcra Hakimiyyətinin başçısı Mübariz Əhmədzadə minilliklər boyu formalaşan adət-ənənələrimizi qoruyaraq milli varlığımıza bolluq və bərəkət rəmzi kimi daxil olan “Novruz” bayramının ümummilli liderimiz Heydər Əliyevin xalqın təkidi ilə hakimiyyətə qayıdışından sonra dövlət səviyyəsində böyük təntənə ilə qeyd olunduğunu xüsusi vurğulamış. Novruz bayramının YUNESKO-nun dünya xalqlarının mədəni irsi siyahısına daxil edilməsində möhtərəm Prezidentimiz cənab İlham Əliyevin və Heydər Əliyev Fondunun Prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın  xidmətlərini qeyd etmişdir. Daha sonra rayon rəhbəri bu əziz el bayramı münasibəti ilə bütün zaqatalalıları təbrik etmiş, hər kəsə can sağlığı, xoş arzular bildirmişdir.

Bir neçə saat davam edən el şənliyi hər kəsin ruhunu oxşamış, bayram ovqatını artırmışdır.

Elə həmin gün axşam Heydər parkında respublika incəsənət ustalarının bayram konserti zaqatalalıların sevincinə sevinc qatmışdır.

Konsertin sonunda bayram atəşfəşanlığı təşkil olunmuşdur.

İlqar HƏSƏNOV,  “Xalq qəzeti”nin bölgə müxbiri