Moskva Dövlət Linqvistika Universitetində (MDLU) Azərbaycan xalqının ümummilli lideri Heydər Əliyevin anadan olmasının 88-ci ildönümü ilə əlaqədar tədbir keçirilmişdir.
Bu ali təhsil ocağının Azərbaycan dili və mədəniyyəti mərkəzində təşkil olunmuş tədbirdə universitetin müəllim və tələbələri iştirak etmişlər.
Mərkəzin rəhbəri, filologiya elmləri doktoru, Bakı Slavyan Universitetinin professoru Bella Musayeva ulu öndər Heydər Əliyevin siyasi fəaliyyətindən, ümummilli liderin Azərbaycan xalqının müstəqilliyi, suverenliyi və tərəqqisi uğrunda şərəfli həyat yolundan danışmışdır.
Sonra ümummilli liderimiz Heydər Əliyev haqqında sənədli film nümayiş etdirilmişdir.
Azərbaycan dili və mədəniyyəti mərkəzi dahi siyasi xadim, müasir müstəqil Azərbaycan dövlətinin banisi Heydər Əliyevin anadan olmasının 88-ci ildönümünü geniş tədbirlər planı ilə qeyd etməyi planlaşdırır.
B.Musayeva ulu öndərin doğum günü ilə əlaqədar universitetdə Heydər Əliyevin həyatına və siyasi fəaliyyətinə həsr olunmuş kitab və fotosərginin, "Xalqa həsr olunmuş həyat" mövzusunda "dəyirmi masa"nın və bu ali təhsil müəssisəsinin müəllim və tələbələrinin iştirakı ilə "Heydər Əliyev- ümummilli lider" adlı açıq dərsin keçiriləcəyini də söyləmişdir.

AzərTAc