Azərbaycanın sərhədlərini yüksək səviyyədə qorumaq, beynəlxalq terrorizmə, qanunsuz miqrasiyaya, qaçaqmalçılığa, narkotik vasitələrin qeyri-qanuni dövriyyəsinə qarşı daha qətiyyətlə mübarizə aparmaq üçün Dövlət Sərhəd Xidməti (DSX) mövcud imkan və vasitələrdən bacarıqla istifadə edir, sərhədlərimizin mühafizəsi işini daim təkmilləşdirir. 
DSX-nin mətbuat xidmətindən bildirmişlər ki, sərhəd pozucularının, qaçaqmalçıların narkotik maddələrin daşınması üçün ölkəmizin ərazisindən tranzit kimi istifadə etmək istəyən cinayətkarların qarşısına keçilməz sədd çəkilir.
Aprelin 11-də gecə saat 00:20 radələrində Yardımlı rayonunun Alar kəndi yaxınlığında yerləşən sərhəd zastavasının xidməti ərazisində narkotik vasitələrin qaçaqmalçılığı ilə məşğul olan iki nəfər İran İslam Respublikası vətəndaşı saxlanılmışdır. Onların üzərindən 1 kiloqram heroin, kəlbətin, fənər, bıçaq və mobil telefonlar aşkar olunaraq götürülmüşdür.
Hazırda faktla bağlı əməliyyat-istintaq tədbirləri davam etdirilir.