Naxçıvan Muxtar Respublikası Ali Məclisinin sədri Vasif Talıbov ABŞ-ın Stratfor özəl elmi korporasiyasının qurucusu, icraçı direktoru və baş analitiki George Fridmanla görüşmüşdür.  
Ali Məclisin sədri maraqlı həyat yolu keçmiş, tanınmış mütəxəssis George Fridmanın muxtar respublikaya səfərindən məmnunluğunu bildirərək demişdir: Naxçıvan Azərbaycanın tərkibində muxtar respublikadır. Biz bilirik ki, siz Naxçıvan haqqında geniş məlumata maliksiniz. Qələmə aldığınız maraqlı kitablarınız, uzaqgörən fikirləriniz onu deməyə əsas verir ki, səfəriniz çərçivəsində Naxçıvan Dövlət Universitetinin Beynəlxalq münasibətlər və xarici dillər fakültəsinin müəllim və tələbləri ilə görüşünüzdə onlar çox şey öyrənəcəklər. Ali Məclisin sədri George Fridmanın səfərdən məmnun qalacağına, əlaqələrin bundan sonra davam etdiriləcəyinə əminliyini bildirmişdir.
"Mən Naxçıvanı tanımadan Azərbaycanı tanıya bilmərəm", - deyən George Fridman Naxçıvanın Azərbaycan mədəniyyətinin beşiyi olduğunu vurğulamış, muxtar respublikaya səfərinin tanışlıq xarakteri daşıdığını bildirmiş, səmimi görüşə görə təşəkkür etmişdir.
Qonaq ikigünlük səfəri çərçivəsində muxtar respublikanın görməli yerləri, tarixi abidələri, mədəniyyət müəssisələri ilə tanış olacaq, Naxçıvan Dövlət Universitetinin Beynəlxalq münasibətlər və xarici dillər fakültəsinin müəllim və tələbələri ilə görüşəcəkdir.

AzərTAc