Aprelin 14-də Almaniyanın Humbolt-Berlin Universitetinin "Azərbaycan tarixi" kafedrasının müdiri, professor Eva Mariya Aux Azərbaycan Respublikasının Prezidenti yanında Strateji Araşdırmalar Mərkəzində (SAM) olmuşdur. 
SAM-ın direktor müavini Gülşən Paşayeva qonağa mərkəzin fəaliyyəti, nəşr edilmiş elmi dərgilər, yerli və beynəlxalq əhəmiyyətli tədbirlər, layihələr barədə ətraflı məlumat vermişdir.
Humbolt Universitetinin "Azərbaycan tarixi" kafedrasında ölkəmizin tarixi və mədəniyyətinin tədrisi barədə danışan Eva Mariya Aux bildirmişdir ki, tələbələrin Azərbaycanı daha yaxından tanımaları üçün bir sıra tədbirlərin həyata keçirilməsini planlaşdırılır.
Almaniyalı qonaq G.Paşayevanı Humbolt Universitetində mühazirə oxumağa dəvət etmişdir.
Görüşdə Azərbaycan ilə Almaniya arasında münasibətlərin müxtəlif sahələrdə inkişafından məmnunluq bildirilərək, bu əlaqələrin bundan sonra da genişlənəcəyinə əminlik ifadə olunmuşdur. Humanitar sahədə əməkdaşlığın inkişaf etdirilməsinin, elm, təhsil, xüsusilə iki ölkənin "beyin mərkəzləri" arasında elmi-tədqiqat sahəsində müxtəlif layihələrin həyata keçirilməsinin vacibliyi vurğulanmışdır.
Bundan əlavə, görüşdə regional və beynəlxalq, eləcə də bir sıra qarşılıqlı maraq doğuran məsələlər ətrafında fikir mübadiləsi aparılmışdır.

AzərTAc