Aprelin 11-də Dünya Gömrük Təşkilatının Bakıdakı Regional Tədris Mərkəzində "Harmonik Sistem 2012 - tətbiqi və tarif idarəetməsi" mövzusunda regional seminar işə başlamışdır. 
Seminarın açılışında Dövlət Gömrük Komitəsinin sədri, gömrük xidməti general-leytenantı Aydın Əliyev, Dünya Gömrük Təşkilatının texniki əməkdaşı Alvaro Fernandez Acebes və digərləri çıxış edərək tədbirin əhəmiyyətindən və vacibliyindən danışmışlar. Vurğulanmışdır ki, 15 ölkədən, o cümlədən Azərbaycan, Rusiya, Türkiyə, Gürcüstan, Belarus, Latviya və başqalarında gömrük orqanlarının nümayəndələri tədbirdə iştirak edirlər. Aktual mövzuya həsr olunan seminarın uğurlu keçəcəyinə əminlik ifadə edilmiş, bu sahədə tərəflərin öz bilik və təcrübələrini bölüşməsinin ümumi işə töhfə verəcəyi diqqətə çatdırılmışdır.
Seminarın ilk günündə Dünya Gömrük Təşkilatı və onun missiyası, Harmonik Sistem (HS) Konvensiyası, Harmonik Sistemin strukturu, ümumi təsnifat prinsipləri, ümumi şərh qaydaları və qeydlər, Harmonik Sistemin təkmilləşdirilməsi və digər mövzularda məruzələr dinlənilmiş, müzakirələr aparılmışdır.
Tədbir aprelin 15-dək davam edəcəkdir.