Aprelin 9-da Türkiyənin məşhur "Akare International Education Fairs" şirkətinin təşkilatçılığı ilə Bakıda 2011-ci ilin ən böyük təhsil sərgisi açılmışdır. 
Sərgidə Türkiyə, Avstraliya, Birləşmiş Ərəb Əmirlikləri, İngiltərə, İsveç, İsveçrə, Litva və digər ölkələrin universitetləri iştirak edirlər. Sərgidə ümumilikdə 12 ölkənin 60 ali təhsil ocağı təmsil olunmuşdur.
Tədbirdə xaricdə sertifikatlaşdırılmış təhsil, MBA proqramları və dil kursları barədə ətraflı məlumat verilmişdir. Təhsil müəssisələrinin nümayəndələri təmsil etdikləri qurumlarda təhsil almaq şərtlərini, ölkələrində tələbələrə nəzərdə tutulan güzəştlər, gündəlik xərclər və s. məsələlərlə bağlı sualları cavablandırmışlar.
Sərginin açılış mərasimində Türkiyənin ölkəmizdəki səfirliyinin təhsil üzrə müşaviri Abdullah Özişçi, "Akare International Education Fairs" şirkətinin icraçı direktoru Nazim Özsoylu, Qafqaz Universitetinin rektoru Əhməd Saniç və başqaları iştirak etmişlər.
Təhsil sərgisi iki gün davam edəcəkdir.