2011-ci ilin mart ayı ərzində dövlət sərhədinin 37 dəfə pozulması halının qarşısı alınmış, 69 nəfər saxlanılmışdır. 
Dövlət Sərhəd Xidmətinin mətbuat mərkəzindən AzərTAc-a bildirmişlər ki, sərhəd pozucularının 49-u Azərbaycan, 8-i Əfqanıstan, 5-i İran, 3-ü Gürcüstan, 2-si Rusiya,1-i isə Qırğızıstan vətəndaşıdır.
Sərhəd rejim qaydalarını pozduqları üçün sərhədin yaşıl sahəsində 26 nəfər, Xəzər dənizində sahilboyu rejim qaydalarını pozduqları üçün 21 nəfər saxlanılaraq barələrində müvafiq tədbirlər görülmüşdür.
Axtarışda olan 117 nəfər saxlanılaraq hüquq-mühafizə orqanlarına təhvil verilmişdir.
Narkotik vasitələrin qanunsuz dövriyyəsinə qarşı mübarizə tədbirləri nəticəsində 5 kiloqram 248 qram narkotik maddənin dövlət sərhədindən keçirilməsi cəhdinin, ümumi dəyəri 164 min manat olan qaçaqmalın sərhəddən keçirilməsinin qarşısı alınmışdır. Bir əl qumbarası, 250 ədəd 12 mm-lik patron, 1 tir tüfəngi, 17500 metr balıq toru, çoxsaylı mobil telefon və aksesuarları, kosmetik vasitələr, spirtli içkilər, siqaretlər, dərman preparatları, geyim əşyaları, ərzaq və kənd təsərrüfatı məhsulları qaçaqmal kimi Dövlət Sərhəd Xidməti əməkdaşları tərəfindən götürülmüşdür.