Ümumdünya Mədəniyyətlərarası Dialoq Forumunu təşkil etdiyi üçün Azərbaycan dövlətinə və hökumətinə təşəkkür edirik.
Bunu AzərTAc-a Ümumdünya Mədəniyyətlərarası Dialoq Forumunda iştirak etmək üçün Azərbaycanda səfərdə olan Avropa Şurası Parlament Assambleyasının (AŞPA) sədri Mövlud Çavuşoğlu bildirmişdir.
M.Çavuşoğlu demişdir ki, AŞPA sədri olaraq Avropada mədəniyyətlərarası və dinlərarası dialoqun artırılması və inkişaf etdirilməsi mənim üçün prioritet sahələrdən biridir. Xüsusilə son dövrlərdə irqçiliyin, ekstremizmin və dini ayrı-seçkiliyin artmasının qarşısının alınması ilə mübarizənin ən mühüm vasitəsi mədəniyyətlərarası dialoqun artırılmasıdır. Azərbaycan tərəfi belə bir tədbiri təşkil etməklə təkcə mədəniyyətlərarası dialoqun inkişafına deyil, Avropa Şurasının da işinə köməklik göstərmiş oldu. Biz Azərbaycanın bu cür təşəbbüslərini dəstəkləyir və yüksək qiymətləndiririk. Bu tədbir həm də Azərbaycanın beynəlxalq imicinin artmasına və mövqelərini möhkəmlənməsinə xidmət edir.
M.Çavuşoğlu qeyd etmişdir ki, AŞPA da apreldə mədəniyyətlərarası dialoqun dini elementləri ilə bağlı mühüm tədbir keçirəcəkdir. Tədbirdə beş əsas dinin Avropadakı liderlərinin, eləcə də müxtəlif konfessiyaların, qurumların nümayəndələrinin iştirakı nəzərdə tutulmuşdur. İyun ayında isə qeyri-hökumət təşkilatlarının və siyasi liderlərin iştirakı ilə bu istiqamətdə daha geniş müzakirələr təşkil olunacaqdır.