Xəbər verdiyimiz kimi, Bakıda keçirilən Ümumdünya Mədəniyyətlərarası Dialoq Forumu ərəfəsində dünya xalqları və müxtəlif sivilizasiyalar arasında "Mədəniyyətlərarası dialoq mövzusunda ən yaxşı fotoşəkil" müsabiqəsi elan edilmişdir. 
Forumun keçirildiyi "Gülüstan" sarayında açılmış fotosərgidə yüzdən çox əsər nümayiş olunmuşdur. Forum iştirakçıları qalibləri gizli səsvermə yolu ilə müəyyənləşdirmişlər.
Azərbaycanda və dünyada yaşayan müxtəlif xalqlar, mədəniyyətlər və dinlər arasında birgə yaşama ənənələrinə, dialoq və əməkdaşlığın təbliğinə xidmət edən fotomüsabiqənin qalibləri aprelin 8-də "Buta" sarayında mükafatlandırılmışlar.
Tədbirdə çıxış edən mədəniyyət və turizm naziri Əbülfəs Qarayev forumun öz işini uğurla başa çatdırdığını vurğulamışdır. Nazir forumun işində yüksək səviyyədə iştirak etdiklərinə görə bütün qonaqlara Azərbaycan Prezidenti İlham Əliyevin adından dərin təşəkkürünü bildirmişdir.
Qeyd edilmişdir ki, gizli səsvermə yolu ilə fotomüsabiqə iştirakçılarına verilmiş ballar əsasında qaliblərin adı müəyyənləşdirilmişdir.
Müsabiqənin nəticələrinə əsasən, Şirin Rzayeva "Xınalıqda bir oğlan" adlı əsərinə görə birinci, Rafiq Qəmbərov "Biz bir ailəyik" fotoşəkilinə görə ikinci, Fərid Xayrulin "Mədəniyyətlərin dialoqu" adlı fotosuna görə üçüncü yerə layiq görülmüşlər.
Qaliblərə diplom və pul mükafatı təqdim olunmuşdur.
Tədbir geniş konsert proqramı ilə davam etdirilmişdir.