Aprelin 6-da Estoniyanın sabiq xarici işlər naziri, xanım Kristina Ojuland Avropa Parlamentində "Avropa Qonşuluq Siyasəti" mövzusunda keçirilmiş müzakirələrdə çıxış edərək Ermənistan-Azərbaycan, Dağlıq Qarabağ münaqişəsinə toxunmuşdur.
Dağlıq Qarabağın Azərbaycanın ayrılmaz hissəsi olduğunu vurğulayan K.Ojuland bildirmişdir ki, Cənubi Qafqazı əhatə edən Avropa Qonşuluq Siyasəti, yaxud digər siyasətlər müzakirə olunarkən Azərbaycanın və Gürcüstanın ərazi bütövlüyü həmişə diqqət mərkəzində saxlanılmalıdır.
Dağlıq Qarabağın 20 il əvvəl ermənilər tərəfindən işğal olunduğunu və bunun nəticəsində bir milyonadək azərbaycanlının öz yurdlarından didərgin düşdüyünü qeyd edən K.Ojuland Avropa Parlamentini Dağlıq Qarabağın Azərbaycanın beynəlxalq səviyyədə tanınmış ərazisi olması faktına hörmət etməyə çağırmışdır.
Sabiq xarici işlər naziri demişdir ki, bu fakt Avropa Parlamentinin, Avropa Şurasının və Avropa Komissiyasının hər bir təşəbbüsündə öz əksini tapmalıdır. Yalnız ərazi bütövlüyü prinsipi beynəlxalq ictimaiyyət tərəfindən tanınandan sonra Cənubi Qafqazda sülhə və sabitliyə nail olmaq mümkündür.