Sağlam cəmiyyətdə, sağlam rəqabət olmalıdır. Əfsuslar olsun ki, sivil rəqabət aparmaq imkanından uzaq olan aqressiv müxalifət xaricdən tapşırıq aldıqca vaxtaşırı insanları, xüsusən də gəncləri öz əməllərinə alət etməyə çalışır. Qeyri-qanuni yollarla hakimiyyəti ələ keçirməyə cəhdlər edir. Köhnə təbliğat üsulu ilə fəaliyyət göstərən radikal partiya rəhbərləri xarici himayədarlarına kölə kimi xidmət göstərirlər.
Mən, uzun illər müxalifətin bir çox tədbirlərində iştirak etmişəm və onların gizli iyrənc niyyətlərini çoxdan hiss etmişəm. Lakin son zamanlar onların törətdiklərini gördükdə yanılmadığımı, onların xalqımıza doğrudan da düşmən kəsildiyini bir daha özlüyümdə yəqin etdim. Müxalifətin respublikada gedən inkişafı görməməzliyə vurması hər şeyə qara yaxması məni həqiqətən hiddətləndirir. İcazəsiz mitinqlər keçirərək, mənasız istefa şüarları səsləndirərək şəhərin mərkəzində dağıntılar törədirlər. Bu işə qeyri-yetkin gəncləri cəlb edərək onları səhv yola təhrik edirlər.
Mən, belə müxalifətlə nəinki razılaşmıram, onların bütün addımlarına qarşı kəskin tədbir görülməsini tələb edirəm. Belə bir partiyanın sıralarında bir an belə qalmağı özümə şərəfsizlik hesab edirəm.

Əliəşrəf Nəcməddin oğlu Mikayılov, Müsavat Partiyasının üzvü, Balakən rayonu, Kortala kənd sakini