15 İyun Milli Qurtuluş Günü  və Ramazan bayramı ərəfəsində  paytaxtın Nəsimi rayonunda daha bir “Abad həyət” istifadəyə verilmişdir. Nəsimi Rayon İcra Hakimiyyətinin III mikrorayon ərazisindəki məhəllədə sürətlə başa çatdırdığı əsaslı yenidənqurma və geniş abadlıq işlərindən sonra hər cür rahatlıq və gözəllik yaradılmış həyət sakinlərə bayram hədiyyəsi edilmişdir.  

Yeni həyətin açılış mərasimində sakinləri qarşıdan gələn bayramlar münasibəti ilə təbrik edən Nəsimi Rayon İcra Hakimiyyəti başçısı Asif Əsgərov bildirmişdir ki,  Prezident  İlham Əliyevin rəhbərliyi ilə ölkəmizdə həyata keçirilən hərtərəfli yeniləşmə və tərəqqi siyasəti rayonda da uğurla davam etdirilir, ərazidə bir sıra sosial-mədəni layihələr gerçəkləşdirilir. Paytaxtın iri yaşayış massivlərindən olan mikrorayonlarda son dövrdə aparılan genişmiqyaslı abadlıq-quruculuq işləri, yaradılan “Abad həyət”lər sakinlərin yüksələn rifahına, gündəlik rahatlığına xidmət edir. RİH-in bilavasitə iştirakı və köməyi ilə rayonunun  ayrı-ayrı ünvanlarında da quruculuq-abadlıq tədbirləri aparılır,  həyətlərdə əsaslı təmir və yaşıllaşdırma işləri davam etdirilir.

Mərasim RİH başçısının yeni “Abad həyət”in sakinləri ilə keçirdiyi səyyar qəbulla davam etmişdir.  Görüşdə iştirak edənlərin müraciətləri ilə bağlı rayon qurumlarının rəhbərlərinə, xidmət sahələrinin  məsul şəxslərinə müvafiq tapşırıqlar verilmişdir. Qəbulun gedişində sakinləri maraqlandıran digər məsələlər barədə də söhbət aparılmışdır.

Sakinlər dövlətimizin layiqli bayram hədiyyəsinə, əhalinin rifahı və rahatlığı  üçün görülən genişmiqyaqslı işlərə görə Prezident  İlham Əliyevə dərin minnətdarlıqlarını bildirmişlər.

Ramazan bayramı və Qurtuluş günü münasibəti ilə rayon ərazisində yaşayan mindən artıq Qarabağ müharibəsi veteranı, əlili və şəhidi ailəsinə, yaşlı və aztəminatlı sakinə ərzaq bağlaması verilmişdir.  Zabitlər parkında isə sosial qayğıya ehtiyacı olan ailələrin uşaqları üçün bayram şənliyi keçirilmiş, onlara hədiyyələr təqdim olunmuşdur.

R.TAHİR,
“Xalq qəzeti”