Azərbaycan Diplomatik Akademiyasından (ADA) bildirmişlər ki, ADA-nın ənənəvi yay məktəbinə sənədlərin qəbulu aprelin 20-də başa çatır.
Akademiya artıq beşinci ildir ki, enerji mövzusuna dair yay məktəbi təşkil edir. İyulun 2-dən 16-dək Dövlət Neft Şirkəti ilə birgə təşkil olunacaq Bakı yay enerji məktəbinə ekologiya və təbii sərvətlər, sənaye və energetika nazirliklərinin, Dövlət Neft Fondunun, habelə Azərbaycanda fəaliyyət göstərən xarici neft-qaz şirkətlərinin nümayəndələri də qatılacaqlar. Yay məktəbində Xəzər regionu ölkələrinin, ABŞ-ın Rice və Texas A&M universitetlərinin tanınmış professorları mühazirə oxuyacaq, Nabukko layihəsinin təmsilçiləri, Avropanın aparıcı ali təhsil ocaqlarının mütəxəssisləri isə təcrübələrini bölüşəcəklər.
Yay məktəbində enerji siyasətinin iqtisadi və siyasi əsasları, ətraf mühitə təsiri, regional inkişafa töhfəsi və digər məsələlər müzakirə ediləcəkdir.
İndiyədək 37 ölkənin 140-dək nümayəndəsi ADA-nın yay məktəbinin dinləyicisi olmuşdur.