Gürcüstanın Azərbaycanda yeni təyin olunmuş səfiri Teymuraz Şaraşenidze martın 18-də fövqəladə hallar naziri, general-polkovnik Kəmaləddin Heydərovla görüşmüşdür. 
Fövqəladə Hallar Nazirliyindən bildirmişlər ki, K.Heydərov qonağa respublikamızda fövqəladə halların idarə olunması sahəsində görülən işlər, nazirliyin strukturuna daxil olan qurumların fəaliyyəti barədə ətraflı məlumat vermişdir. Nazir hər iki ölkədə təbii və texnogen xarakterli fəlakətlərin qarşısının çevik şəkildə alınması və nəticələrinin birgə aradan qaldırılması üçün Gürcüstanın müvafiq qurumları ilə əməkdaşlığın genişləndirilməsində maraqlı olduğu səfirin diqqətinə çatdırılmışdır.
Səfir səmimi qəbula görə təşəkkürünü bildirmiş və ölkələrimiz arasında aidiyyəti qurumların əməkdaşlığının daha da genişləndirilməsinin və inkişaf etdirilməsinin vacibliyini vurğulamışdır.
Görüşdə qarşılıqlı maraq doğuran digər məsələlər ətrafında geniş fikir mübadiləsi aparılmışdır.