Ermənistanda səfərdə olan ATƏT-in fəaliyyətdə olan sədri, Litvanın xarici işlər naziri Audronyus Ajubalis martın 18-də Yerevanda münaqişə tərəflərini Dağlıq Qarabağ probleminin nizamlanması prosesində irəliləyişlər əldə etməyə və snayperləri qoşunların təmas xəttindən dərhal geri çəkməyə çağırmışdır.
Mətbuat üçün açıqlama verən A.Ajubalis demişdir ki, prezidentlərin razılaşması əsasında dünən Azərbaycan və Ermənistan arasında hərbi əsirlərin dəyişdirilməsinin baş tutmasını alqışlayıram. Biz atəşkəs rejimini gücləndirməli və tərəflər arasında digər etimadyaradıcı vasitələrdən istifadə etməliyik. Hesab edirəm ki, tərəflər martın 5-də Soçidə razılaşdığı kimi, təmas xəttində baş vermiş insidentlər araşdırılacaqdır.
İndi danışıqlar prosesində əsl dönüş yaradılmasının vaxtı yetişmişdir.
ATƏT-in fəaliyyətdə olan sədrinin Cənubi Qafqaz ölkələrinə beşgünlük səfəri Yerevanda başa çatmışdır.

Elgün NİFTƏLİYEV AzərTAc-ın xüsusi müxbiri
Vyana