Martın 17-də ABŞ-ın Azərbaycandakı səfirinin iqamətgahında Novruz bayramı münasibətilə tədbir keçirilmişdir. 
Səfirliyin əməkdaşları və onların ailə üzvləri üçün təşkil edilmiş tədbirdə Azərbaycan xalqının milli adət-ənənələrinə uyğun olaraq, masalara xonça və səmənilər düzülmüş, milli təamlarla zəngin bayram süfrəsi açılmışdır.
Amerika Birləşmiş Ştatlarının ölkəmizdəki səfiri Mətyu Brayzə milli bayram münasibətilə Azərbaycan xalqını təbrik etmiş, ən xoş arzularını dilə gətirmişdir. Səfir ilk dəfə ölkəmizdə Novruz bayramını qeyd etməkdən məmnun olduğunu vurğulamışdır.
Tədbirdə iştirak edən xarici qonaqlara Novruz bayramı haqqında məlumat verilmiş, bu günün baharın gəlişinin müjdəçisi olduğu diqqətə çatdırılmışdır.
Mərasim milli musiqi və rəqslərlə davam etmişdir.
Tədbirin sonunda səfirliyin əməkdaşları Novruz adət- ənənəsinə uyğun olaraq bayram tonqalının üzərindən tullanmışlar.
Bayram mərasimi qonaqlarda dərin təəssürat oyatmışdır.