ABŞ Azərbaycanlıları Şəbəkəsi (USAN) ABŞ Konqresini məlumatlandırmaq səyləri çərçivəsində Vaşinqtonda tədbir təşkil etmişdir.
USAN-dan bildirmişlər ki, ABŞ-ın bir çox tanınmış siyasi xadimləri, Konqres rəhbərləri və Vaşinqtonda akkreditə olunmuş diplomatlar Azərbaycan diasporunun təşkil etdiyi bayram tədbirində iştirak etmişlər.
Tədbirdə iştirak edən Konqres üzvləri, o cümlədən Ohayo ştatından olan respublikaçı və indiki sədr Con Boner, senator Bob Mançin, konqresmenlər Dan Börton, Fil Qinqrey və digər qonaqlar, Azərbaycan-Amerika icması tərəfindən siyasi maarifləndirmə aparılması, federal və ştat rəsmiləri ilə daha çox əlaqələrin qurulması istiqamətində görülmüş işlərlə tanış olmuşlar.
ABŞ mətbuatında Azərbaycanın Dağlıq Qarabağ bölgəsinin Ermənistan tərəfindən işğal olunması, Xocalı soyqırımı barədə dərc edilmiş materiallar, USAN-ın son nailiyyətlərindən olan Texas Parlamentinin Nümayəndələr Palatasında Amerika azərbaycanlıları ilə bağlı qəbul olunmuş ilk qətnamə Konqres rəhbərlərinə təqdim olunmuşdur.
USAN Konqresi məlumatlandırmaq üçün tədbirlərini bundan sonra da davam etdirəcəyini bildirmişdir.

AzərTAc