Kənd Təsərrüfatı Nazirliyi yanında Dövlət Baytarlıq Nəzarəti Xidmətində Avropa İttifaqının dəstəyi ilə Azərbaycan, Fransa və Macarıstanın kənd təsərrüfatı nazirlikləri tərəfindən birgə həyata keçirilən "Azərbaycanda epidemioloji nəzarət sisteminin gücləndirilməsi istiqamətində Dövlət Baytarlıq Nəzarəti Xidmətinə (DBNX) dəstək" tvinninq layihəsinin bağlanışına həsr olunmuş tədbir keçirilmişdir.

Tədbir Kənd Təsərrüfatı Nazirliyi ilə Avropa İttifaqının (Aİ) birgə təşkilatçılığı ilə baş tutumuşdur.

Tvinninq layihəsinin əsas məqsədi Azərbaycanda heyvan və insan sağlamlığını qorumaq, kənd təsərrüfatı sektorunda iqtisadi artıma və qida təhlükəsizliyi üzrə vəziyyətin yaxşılaşdırılmasına töhfə vermək üçün Beynəlxalq Epizootik Büronun (BEB) tələblərinə uyğun olaraq respublikada heyvan xəstəliklərinin, zoonozların epidemiologiyası, profilaktikası və xəstəliklərə nəzarət sahəsində Dövlət Baytarlıq Nəzarəti Xidmətinin potensialını daha da gücləndirməklə DBNX-nin imkanlarını genişləndirməkdən ibarət olmuşdur.

Tvinninq layihəsinin bağlanış tədbirində Aİ-nin nümayəndəliyinin təmsilçisi, Fransa və Macarıstanın Azərbaycandakı səfirləri, Fransiz-Macar Konsorsumu, BMT-nin Ərzaq və Kənd Təsərrüfatı Təşkilatı (FAO), ABŞ-ın Təhlükənin Azaldılması üzrə Müdafiə Agentliyi(DTRA), Dünya Bankı, ACİP layihəsi, Tvininq layihəsinin Bakı ofisi, Kənd Təsərrüfatı, Səhiyyə,  Ekologiya və Təbii Sərvətlər, Fövqəladə Hallar, Rabitə və İnformasiya Texnologiyaları, İqtisadiyyat və Sənaye, Daxili İşlər, Təhsil nazirlikləri, Qida Təhlükəsizliyi Agentliyi, İDEA Heyvanlara Qayğı Mərkəzi və digər müvafiq aidiyyəti qurumların nümayəndələri  iştirak etmişlər.

Tədbiri Kənd Təsərrüfatı Nazirliyi yanında Dövlət Baytarlıq Nəzarəti Xidmətinin rəisi, layihənin benefisar müəssisə (BM) tərəfindən rəhbəri Azər Süleymanov  açaraq, layihənin məqsədlərindən və layihə çərçivəsində görülən tədbirlərdən ətraflı məlumat vermişdir. Layihənin uğurla başa çatması ilə əlaqədar Avropa İttifaqına, Fransa və Macarıstan hökumtlərinə minnətdar olduğunu bildirmişdir.

Nazirliyin Heyvandarlığın inkişafı şöbəsinin müdiri Qalib Əbdüləliyev ölkəmizdə kənd təsərrüfatı sahəsində görülən tədbirlər haqda məlumat vermiş və layihənin uğurla başa çatması münasibəti ilə icraçıları və Dövlət Baytarlıq Nəzarəti Xidmətini təbrik etmiş və  Kənd Təsərrüfatı Nazirliyi ilə Avropa İttifaqı ilə birgə aparılan tədbirlərdən və səmərəli nəticələrdən danışmışdır.

Bağlanış tədbirində daha sonra Aİ-nın Azərbaycandakı nümayəndəliyinin təmsilçisi Jeroen Villems, Fransanın Azərbaycandakı səfiri Aurelia Buşez, Macarıstanın Azərbaycandakı səfiri Viktor Szederkenyi, Fransa Kənd Təsərrüfatı Nazirliyinin nümayəndəsi Olivye Fojer, Macarıstan Kənd Təsərrüfatı Nazirliyinin nümayəndəsi Lilla Egri, tərəfdaş ölkənin layihə rəhbəri (Fransa) Fransis Jeijer, 1-ci komponentin rəhbərləri Ramiz Salmanov və Jujanna Zogiyeni, 2-ci komponentin rəhbərləri Klement Əsədov və Akoş Jozviakı çıxış etmişlər.

Çıxış edənlər Tvinninq layihəsinin əhəmiyyətindən danışaraq vurğulamışlar ki, bu layihə Azərbaycanda uğurla həyata keçirilmiş, gələcəkdə Avropa İttifaqının standartlarına uyğun heyvan sağlamlığının qorunması sahəsində və ərzaq təhlükəsizliyinin etbarlı təminatında böyük töhfələr verəcəkdir.

Z.BƏŞİRQIZI,
“Xalq qəzeti”