“Heydər Əliyev müasir Azərbaycanın memarı və qurucusudur”. Lənkəran şəhərindəki Heydər Əliyev Mərkəzində keçirilən konfrans bu mövzuya həsr olunmuşdur.

Ulu öndərin həyat və fəaliyyətinə həsr olunmuş xronikanı əks etdirən video-çarxın nümayişi ilə başlanan konfransı giriş sözü ilə Lənkəran ŞİH-nin başçısı Taleh Qaraşov açıb. Natiq Azərbaycan xalqının ümummilli lideri, dünya şöhrətli siyasətçi və dövlət xadim Heydər Əliyevin hələ sovet dövründə respublikamızın inkişafında, müstəqillik illərində isə dövlətimizin qorunmasında və rəvan inkişaf yoluna çıxmasında göstərdiyi misilsiz xidmətlərdən söz açaraq, bu tarixi missiyanın xalq tərəfindən həmişə ehtiramla xatırlandığını diqqətə çatdırıb. İcra başçısı müasir Azərbaycan dövlətinin inamla irəliləyərək dünyanın qabaqcıl dövlətlərindən birinə çevrilməsinin ulu öndərin müdrik düşüncəsi və yorulmaz fəaliyyəti sayəsində mümkün olduğunu vurğulayıb. Ümummilli lider Heydər Əliyevin daimi diqqəti ilə Lənkəran rayonunun da sürətlə inkişaf etdiyini və bü gün onun layiqli davamçısı cənab İlham Əliyevin rayonun iqtisadiyyatının, sənaye, kənd təsərrüfatı, sosial və mədəni sahələrinin tərəqqisinə çox böyük qayğıyla yanaşdığını konkret faktlarla əsaslandırıb.

Sonra icra başçısının müavini - ictimai-siyasi və humanitar məsələlər şöbəsinin müdiri Rasilə Əliyevanın məruzəsi dinlənilib. Digər çıxışlarda ümummilli liderin Azərbaycan xalqı qarşısındakı tarixi xidmətləri böyük minnətdarlıq duyğuları ilə xatırlanıb.

Əli NƏCƏFXANLI,
“Xalq qəzeti”