AzərTAc ABŞ Dövlət Departamentinin saytına istinadla xəbər verir ki, ABŞ və Avropa İttifaqı Dağlıq Qarabağ münaqişəsinin tənzimlənməsi məsələsində ATƏT-in Minsk qrupu ilə qarşılıqlı əlaqələri gücləndirmək niyyətindədirlər.
ABŞ Dövlət katibinin köməkçisi Filipp Qordon bu barədə Konqresin Nümayəndələr Palatasının Avropa və Avrasiya məsələləri üzrə yardımçı komitəsində çıxışında məlumat vermişdir.
Dövlət katibinin köməkçisi qeyd etmişdir ki, ABŞ-ın və Aİ-nin Qafqazda birgə səyləri nəticəsində müəyyən tərəqqi əldə edilmişdir, lakin ərazi mübahisələri, habelə siyasi və iqtisadi islahatların davam etdirilməsi zərurəti regionda sabitliyə nail olmaq üçün ciddi maneə kimi qalmaqdadır.
F.Qordon vurğulamışdır ki, Avropada yeni münaqişələr baş verməməsi və region ölkələrinin demokratik gələcəyə doğru irəliləməsinə kömək etmək üçün ABŞ və Avropa əlbir iş aparmalıdır.
O, həmçinin qeyd etmişdir ki, ABŞ Azərbaycan, Gürcüstan, Ukrayna, Belarus, Moldova və Ermənistanın qoşulduğu Avropa İttifaqının "Şərq tərəfdaşlığı" proqramını dəstəkləyir.

AzərTAc